Салкын җилләр белән каршылады
Петербург сине — пайтәхет:
«Тешен сындырып бирә диләр, имеш,
Алла бүрегә бирсә дә бәхет».
                     Язмыш синнән барсын күпсенде шул, —
                     Үрелим дисәң бәхет кошына:
                     «Синең өчен түгел бит ул», — диеп
                     Суга торды һаман учыңа.
Башкаларда инде бер опера
Күрермендер диеп килсәң дә,
Челпәрәмә килде хыялларың —
Алган билет калды кесәңдә.
                     Мариинский театрда әнә
                     Бара иде «Евгений Онегин».
                     Татар тормышыннан шундый әсәр 
                     Язарга дип йөри идең син —
Өлгермәдең.
Һаман шул хасталык
Киртә куя торды юлыңа.
Петербург ул чак зур хөрмәтен
Күрсәтәлми калды
Россиянең бөек улына.
                     Әмма тарих бераз соң булса да
                     Үз хатасын барыбер төзәтте:
                     Үзең баралмаган театрга
                     «Шүрәле»ңне китереп күрсәтте.


By alex009

Җавап калдыру

Сезнең e-mail адресыгыз һәркемгә ачык итеп куелмаячак. Мәҗбүри кырлар * белән тамгаланган